4320. Барша қара халықтың мінезі, өңі қандай болса, білімі, ақылы, мінезі де сондай.

4321. Қара халық мінезі нашар болады; заң, ереже білмейді, заман көшіне ілеспеген.

4322. Әйтсе де, тіпті бұларсыз жұмыс болмас; олармен жақсы қарым-қатынаста бол, бірақ дос болма.

4323. Қараңғы, қара халықтың болмысы әрдайым қап-қара; назар аудар, өзіңді қара қылма.

4324. Қараңғы, қара халықтың мінезі нашар, болмысы тұрпайы; бар істеген ісі күш көрсету, бар болмысы да сондай.

4325. Жеуді, қарын тойғанын білер; тамақтан басқа қайғысы жоқ.

4326. Тыңда, жөн білетін, тәжірибелі сыншы қараңғы халықтың мінезі туралы не дейді.

4327. «Барша қараңғы халық қайғысы қарны үшін; халықтың барша айқасы да тамақ үшін».

4328. Бұл тамақ үшін өте көп халықтар өлді; қазір де қара жер астында өкінішпен от жер.

4329. Қараңғы халық қарны тойса, шектен шығар; олар өздерін баса ұстамаса, бек өзі күш қолданар.

4330. Әй, қандас, олармен қарым-қатынаста бол; ішіп-жейтін асын беріп тұр.

4331. Тіліңмен, сөзіңмен жұмсақ бол, қаласа бер; қара, бергенді алар, ол оның пайдасы, сосын жер.

4332. Көп сөз сөйлеме, сабыр ет, тіліңді күзет; көп айтылған сөздің қадірі қалмас (су сияқты болды).

4333. Тыңда, білім білген, тілін, өзін ұстай білген ер не дейді!

4334. Сөздің бәрі сөз деп тіліңді шығарма; ойлан, сақтан, сөзде керегін біл.

4335. Бір ақылдыны көрдім, аз сөйледі; көп сөйледім деп жылдар өкінді.